Батыс Қазақстан облыстық білім басқармасы, Қазақстан туристік одағы, «А.А.Остапец-Свешников атындағы халықаралық балалар-жасөспірімдер туризмі және өлкетану академиясы» халықаралық қоғамдық ұйымының қолдауымен 2017 жылдың 27-28 сәуір аралығында «Білім. Туризм. Интеграция» тақырыбында халықаралық ғылыми–практикалық конференциясын өткізді.

Конференция жұмысына облыс әкімінің орынбасары М.Тоқжанов, Қазақстан Республикасының облыстарының өкілдері, Ресей Федерациясының Мәскеу, Екатеринбург, Орынбор, Самара қалалары мен Алтай өлкесінен, білім беру ісінің еңбек ардагерлері, барлық аудандар мен қала әкімдерінің орынбасарлары, білім беру бөлімдерінің және оқу орындары, туризм орталықтарының басшылары, қосымша білім беру және жоғары, кәсіптік, техникалық оқу орындарының педагогтары, бұқаралық ақпарат құралдары мен облыстық мекемелердің өкілдері, музей, кітапхана қызметкерлері қатысты.

Конференцияның пленарлық отырысы 27 сәуір күні облыстық қазақ драма театрында өткізілді. Пленарлық отырыс барысында балалар-жасөспірімдер туризмін, ТМД елдерінің туристік-өлкетану қызметі саласындағы ынтымақтастықты дамыту, бейбітшілікті нығайту, халықтар арасындағы достық пен өзара түсіністікті қалыптастыру, республикалық, ұлттық және аймақтық туристік-өлкетану ұйымдары арасындағы байланысты нығайту мәселелері талқыланды.

Сонымен қатар «Үздік туристік маршрут» облыстық байқауының жеңімпаздары марапаттау жүргізіліп, қонақтар назарына музыкалық сәлемдемелер ұсынылды.

Конференция жұмысы Батыс Қазақстан облыстық балалар мен жасөспірімдер туризмі және экология орталығы және аудандық туризм оралықтарында секциялар отырыстармен жалғасты.