2017 жылдың 17 ақпан күні Орал қаласы №44 мектеп гимназиясы базасында «Ата-ана қамқорлығы» Халықаралық қозғалысы шеңберінде ұлттық және жалпыадамзаттық құндылықтар негізінде отбасылық тәрбиелеу мәселелері бойынша «Жалпыадамзаттық құндылықтар – отбасылық тәрбиенің негізі» тақырыбында облыстық ата-аналар конференциясы оздырылды.

Конференцияны пилоттық білім беру ұйымдары деп танылған Орал қаласының  №44 мектеп гимназиясы, №21 «Росинка» бөбекжайы және Орал гуманитарлық –техникалық колледжі педагогтері ұйымдастырып, аудандық қалалық білім беру ұйымдарының «өзін-өзі тану» пәні мұғалімдері, педагог-психологтар, ата-аналар, студенттер мен оқушылар және балабақша тәрбиеленушілері шақырылды.

Пленарлық бөлімде «Жалпыадамзаттық құндылықтарды насихаттауда және отбасылық тәрбиені нығайтудағы  «Өзін-өзі тану»  пәнінің  алатын орны», «Жалпыадамзаттық құндылықтар – отбасылық  тәрбиенің  негізі», «Жалпыадамзаттық құндылықтар – мектептің  оқу-тәрбие үрдісінде», «Бала – ата-ананың, отбасының  айнасы» тақырыптары бойынша ой бөлісілді.

Практикалық бөлімде ата-аналармен белсенді жұмыс түрлері жүргізілді. №21 «Росинка» бөбекжайы тәрбиешісі бүлдіршіндермен «Сила любви» тақырыбында топтық шығармашылық жұмыс өткізсе, №44 мектеп-гимназиясының сынып жетекшілері «Әкем- өмірімнің өнегесі» атты әкелер мектебінің топтық жұмысын көрсетті.

Конференцияға қатысушылар отбасылық тәрбиенің түрлі белсенді әдіс-тәсілдерін қолдана отырып іс-тәжірибелерімен бөлісті және көкейтесті сауалдарына жауап алды.