Батыс Қазақстан облысының Білім басқармасы  және облыстық «Өркен» қосымша білім беру орталығының ұйымдастыруымен  2 сәуір күні жетім балалар мен ата-анасының қамқорлығынсыз қалған балаларға арналған білім беру ұйымдарында тәрбиеленіп отырған неғұрлым қабілетті және кәсіби тұрғыда мол үміт күттіретін балаларды анықтау, балалардың көркемдік-эстетикалық тәрбиесін жетілдіру, жастарды рухани-адамгершілік және азаматтық-патриоттық тәрбие беру, шығармашылығын дамыту проблемасына қалың жұртшылықтың назарын аудару, оларды қолдау мен марапаттау мақсатында қаладағы №7 орта жалпы білім беретін мектебінде облыстық «Таң Шолпан» байқауы өткізілді. Байқауға облыстағы балалар үйлерінің 7-18 жас аралығындағы тәрбиеленушілері қатысты.

Конкурс екі бағытта ұйымдастырылды: жеке орындаушылар конкурсы және вокалды ансамбль мен ұжымдық хор конкурсы. Қазылар алқасы қатысушылардың жоғары даярлықпен келгенін атай отырып, төмендегідей бағалады:
Байқау нәтижесінде, I орынды жеке орындаушы Сарафутдинов Владимир «Отырардағы той» әнімен – облыстық балалар үйі, II орынды жеке орындаушы Шуренова Гулжанел Бауыржанқызы «Хұсниқорлан» әнімен – облыстық отбасы үлгісіндегі балалар ауылы және «Елімнің тұңғыш ел басы» әнімен облыстық балалар үйінің ұжымдық хоры иеленсе, III орынды жеке орындаушы Иванцов Николай Андреевич «Махамбеттер болмаса» әнімен – облыстық отбасы үлгісіндегі балалар ауылы мен «Здравствуйте, Мамы!» әнімен облыстық балалар үйінің вокалдық ансамблі өзара бөлісті.

Байқау жеңімпаздары облыстық Білім басқармасының дипломдарымен және сыйлықтарымен марапатталды.