Жұлдыздарды жандыратын өнер фестивалі |
Сәуір айының 9 - шы жұлдызында Жастар мәдениет үйінде мүмкіндігі шектеулі балалар шығармашылығының «Жұлдызай» фестивалінің облыстық кезеңі өтті. Фестивальге 10 - 18 жас аралығындағы 120 өнерпаз қатысты. Оның ішінде облыстық көру қабілеті бұзылған балаларға арналған арнаулы мектеп -интернаты, облыстық есту және сөйлеу қабілеті бұзылған балаларға арналған мектеп - интернат - кешені, № 15 облыстық көмекші мектеп - интернатының тәрбиеленушілері, сонымен қатар облыстағы мектеп оқушылары бар. Жыл сайын өткізілетін «Жұлдызай» фестивалінің негізгі мақсаты - даму мүмкіндігі шектеулі талантты балаларды анықтау және шығармашылық қабілеттерін дамыту, қоғамның аталған санаттағы балаларға деген көңілін аудару. Фестивальге қатысушылар вокалдық орындау, сурдоаударма ән айту, би, бейнелеу өнері, сәндік - қолданбалы шығармашылық, аталымдары бойынша өз өнерлерін ортаға салды. Фестивальдің барлық қатысушылары облыстық білім басқармасының алғыс хаттары және сыйлықтармен марапатталды. Әділ - қазылардың шешімімен «Жұлдызай» фестивалінің облыстық іріктеу кезеңінің үздік нөмерлері республикалық фестивальдің жыл сайын дәстүрлі түрде ұйымдастырылатын 1 маусым Халықаралық балаларды қорғау күніне арналған галаконцертте өз өнерлерін көрсететін болады. |