Жаңа 2013-2014 оқу жылында облыс бойынша 408 мектеп 87 мыңнан астам оқушылар контингентімен оқу процесін бастады.

Облыстың барлық жалпы орта білім беретін мектептерінде 1 қыркүйек - Білім Күні мерекесі ұйымдастырылған түрде өтті. Салтанатты жиынға облыстық ақпараттық-насихат тобы, депутаттар, облыстық білім басқармасының, аудандық (қалалық) білім беру бөлімінің қызметкерлері, жергілікті жердің әкімдері, ұстаздар, оқушылар және ата-аналар, бұқаралық ақпарат құралдарының қызметкерлері қатысты.

Облысымызда 1 қыркүйекте Жәнібек ауданының Е.Ниетқалиев атындағы орта мектебінің жаңа салынған ғимараты пайдалануға берілді. Облыс әкімі Н.А.Ноғаев мектепті салтанатты түрде ашып, УАЗ маркалы автокөлікті сыйға тартты.

Барлық жалпы орта білім беретін ұйымдарының салтанатты жиындары «Қазақстан – 2050» Стратегиясы: бір халық – бір ел – бір тағдыр» тақырыбындағы алғашқы тәрбие сағаттарымен ұласты. Тәрбие сағаттарына оқушылар, ата-аналар, ұстаздар және шақырылған қонақтар қатысты. Өткізілген сабақтарда жасұрпақты жалпыадамзаттық құндылықтарға, ұлттық мәдениетке, қазақ халқының тарихи дәстүрлеріне құрметпен қарауға, олардың бойында адамгершілік қасиеттердің қалыптасуына азаматтық, патриоттық, ұлтжандылық сезім ұялатуға, Отанға деген сүйіспеншілікті, білімге деген жаңа қөзқарасты қалыптастыруға бағытталды. Тәрбие сағаттары 1-4 сыныптарда саяхат, пікірталас, жарыс, ойын сабақтары түрінде, 5-8 сыныптарда пресс-конференция, сабақ-викторина түрінде, 9-11 сыныптарда пікірталас, іскерлік ойын, дөңгелек үстел түрінде оздырылды.