2013 жылғы 25 сәуірде РФ Самара қаласының №17 көру қабілеті бұзылған балаларға арналған арнаулы түзету мектеп-интернатының базасында мүмкіндігі шектеулі оқушылардың «Мектеп жобасынан - білімнің шыңына» ашық халықаралық ғылыми-сарамандық конференциясы өткен болатын. Конференция жұмысы 6 секцияда өтті.

Оған облыстық көру қабілеті бұзылған балаларға арналған арнаулы мектеп-интернаты «Бірлесіп, көп жасаймыз» әлеуметтік жоба шеңберінде қатысып, оқушылары Н.Сабирова мен А.Утешев конференцияның «Жаратылыстану ғылымы және қазіргі әлем» атты секцияда «Ғарыштық қоқыс» атты ғылыми жобасымен қатысып, ІІ орынды жеңіп алып, мадақтамамен марапатталды. (Жетекші: физика пәнінің I санатты мұғалімі Жумагелдина Н.Е.).

Мектеп-интернаттың 11 сынып оқушысы Д.Идаятов пен мектеп түлегі, қазіргі кезде БҚМУ-дың физика-математика факультетінің 2 курс студенті Д.Карнаухов конференцияның «Математика және ақпараттық технология» секциясына  «Біздің өмірдегі математика» тақырыбындағы ғылыми жобасымен белсенді қатысқаны үшін мақтау қағазына ие болды. (Жетекші: математика пәнінің жоғары санатты мұғалімі Тимиргалиева М.Р.).