Батыс Қазақстан облысы білім басқармасы мектепке дейінгі, жалпы орта, техникалық және кәсіптік білім беру ұйымдары  облыстық оқу-әдістемелік кабинетінің ұйымдастыруымен филологтардың I республикалық съезінің облыстық кезеңіндегі іс-шаралар жоспарына cәйкес ағымдағы жылдың 4 сәуірі күні «Қазақстан Республикасындағы филологиялық білім беру: бүгінгі жағдайы мен болашағы» тақырыбында облыстық «On-line» конференция өтті.

Конференция жұмысына М.Өтемісұлы атындағы БҚМУ ғалымдары, басқарманың мамандары, облыстық әдістемелік кабинеттің, аудандық, қалалық білім бөлімдерінің филология бағытындағы әдіскерлері, пән мұғалімдері қатысты.

Конференция жұмысын облыстық білім басқармасы бастығының орынбасары Р.Хамза ашып, қатысушылар жұмысына сәттілік тіледі.

Конференция жұмысында жаңа оқыту технологияларын қолдану арқылы оқушыларға білімді жүйелі меңгерту, оқулықтар құрылымының мәселесі, ағылшын тілін ерте жастан оқу, ауылдық жерлердегі кадр тапшылығы, филологиялық білім берудің бүгінгі жай-күйі, оқу сауаттылығын дамыту, жаңаша түрде білім жетілдіру бағытында өзекті мәлелелер көтеріліп, талдама жасалды. Қатысушылар тарапынан сұрақтар қойылып, пікірталас ұйымдастырылды.

Тыңдалған баяндамалар негізінде ұсынбалар қабылданып, қатысушылар назарына ұсынылды.

Облыстық «On-line» режимінде өткен конференцияда көтерілген мәселелер Білім және ғылым министрлігіне ұсынылатын болды.