Облыстық білім басқармысымен Орал қаласындағы физика-математикалық бағытындағы «Назарбаев Зияткерлік мектебі» ДББҰ Педагогикалық шеберлік орталығы филиалының базасында 2013 жылғы 29 наурызда сағат 15.00-де Педагогикалық шеберлік орталығы «НЗМ» ДББҰ басшысы Е.К. Қасымбековтың қатысуымен ҚР Білім және ғылым министрлігінің 2013 жылғы 4 қаңтардағы № 1 «Педагог кадрлардың біліктілігін арттыру орталығының нұсқаулығын бекіту  туралы» бұйрығының (бұдан әрі – Бұйрық) мазмұнын түсіндіруге арналған семинар өткізілді.

Семинар жұмысына Батыс Қазақстан облысының Білім басқармасының бастығы А.А.Мыңбаева, Орал қаласындағы физика-математикалық бағытындағы  Назарбаев Зияткерлік мектебінің директоры Ш.М.Қадырова, «Педагогикалық шеберлік орталығы» ЖМ Орал қаласындағы  филиалының директоры А.А.Айтбөкешев, «Өрлеу» біліктілігін арттыру ұлттық орталығы» АҚ-ның Филиалы БҚО бойынша педагогикалық қызметкерлердің біліктілігін арттыру институтының директоры С.С.Измуханбетова,  М.Өтемісов атындағы Батыс Қазақстан Мемлекеттік университетінің оқу ісі жөніндегі проректоры Г. Жүсіпқалиева, аудандық (қалалық) білім беру бөлімдерінің меңгерушілері, «НЗМ» ДББҰ ПШО  тірек мектептерінің директорлары, Орал қалалық,  облыстық  мектептердің директорлары қатысты.

Семинар барысында «НЗМ» ДББҰ  ПШО директоры Е.К.Қасымбеков жарияланған Бұйрықтың мазмұнын, стратегиялық мағынасын толыққанды түсіндіріп өтті.

«Назарбаев Зияткерлік мектебі» ДББҰ мен Кембридж Университетінің Білім факультетімен бірлесе жасалған бағдарламаның біліктілік арттыру жүйесін жетілдірудің маңызды мәселесі - оқытудың тек формасын жаңарту ғана емес, мұғалімдердің кәсіби біліктілігін арттырудың мазмұндық ерекшеліктеріне көңіл бөлінгендігіне ерекше мән берілді.