Батыс Қазақстан облысы білім  басқармасының жоспары бойынша   Қазақстанның батыс өңірін құрайтын Маңғыстау, Атырау, Ақтөбе және Батыс Қазақстан облыстары математика пәні мұғалімдері арасында І аймақтық «Математикалық регата» турнирі 2013 жылдың 28 наурызы күні оздырылды.

Турнир шығармашылықпен жұмыс жасайтын педагогтарды  анықтау, қолдау және мәртебесін көтеру мақсатында өткізілді.

Білім сайысына Маңғыстау облысынан «Каспий», «Ұшқын» топтары, Атырау облысынан «Эрудит», «Интеграл» топтары,  Ақтөбе облысынан «Экстрим» тобы және Батыс Қазақстан облысынан  «Батыс» пен «Пирамида» топтары  қатынасты. Турнир   дарынды балаларға арналған  мамандандырылған С.Сейфуллин атындағы №11 облыстық қазақ мектеп-интернат кешенінде өтті.

Әділқазы мүшелерінің шешімі бойынша аймақтық турнирдің ауыспалы Кубогын Батыс Қазақстан облысының «Батыс» тобы жеңіп алып, І орын иегері атанса, ІІ орынды Ақтөбе облысының «Экстрим» тобы мен Батыс Қазақстан облысының «Пирамида» тобы, ІІІ орынды Маңғыстау облысының  «Каспий», «Ұшқын» топтары және Атырау облысының «Эрудит» тобы иеленді. Ал, Атырау облысынан келген  «Интеграл» тобына «Білімге құштарлық» номинациясы берілді.

Осылайша алғаш рет өтіп, мәресіне жеткен «Математикалық регата» бауырлас батыс өңірі  мұғалімдерінің арасында өз жалғасын табады.