Білім басқармасының мектепке дейінгі, жалпы орта, техникалық және кәсіптік білім беру ұйымдарының оқу-әдістемелік кабинетінің ұйымдастыруымен «Төртінші өнеркәсіптік революция жағдайындағы адами капитал» тақырыбындағы педагогикалық қызметкерлердің облыстық тамыз конференциясы аясында секциялық отырыстар жалғасуда.

Бүгін техникалық және кәсіптік білім беру ұйымдары басшыларының оқу жұмысы жөніндегі орынбасарларының секциясы «Кәсіптік білім беру жағдайында инновациялық процестерді үйлестіру және білім беру мен оқу-практикалық әрекетті интеграциялау» деген атаумен өтті. Аудандар мен облыс орталығындағы колледждерден жиналған мамандар орта білімнен кейін білім беруде эксперименттік оқу бағдарламаларын енгізу, эксперименттік негізде оқытылатын топтардағы оқу процесін тиімді ұйымдастыру, модульдік оқыту, факультатив сабақтардың типтік жоспары мен бағдарламаларын әзірлеу, сағаттарды бөлу секілді мәселелерді ортаға салып, қызу талқылады. Тәжірибе алмасты. Мәселен, Орал ақпараттық технологиялар колледжі директорының оқу ісі жөніндегі орынбасары Ж.Бисалиева ТжКББҰ-да эксперимент шеңберінде оқтылып отырған топтардағы оқу процесін ұйымдастыру туралы сөз қозғаса, «Нәтижелі жұмыспен қамту және жаппай кәсіпкерлікті дамыту бағдарламасы» бойынша модульдік оқытудың мәселелерін Технологиялық колледж директорының оқу ісі жөніндегі орынбасары Г.Исмагулова баяндады. «Мұнай-газ өндірісі» бейіні бойынша республикалық оқу-әдістемелік бірлестігінің іс-тәжірибесі хақында Орал газ, мұнай және салалық технологиялар колледжі жанындағы «Мұнай-газ» бейіні бойынша ОӘБ төраға орынбасары Л.Рамазанова айтып өтті.