ҚР Мемлекеттік қызмет істері және сыбайлас жемқорлыққа қарсы іс-қимыл агенттігі мен Білім және ғылым министрлігі «Қоғамдық бақылау картасы» жобасы аясында еліміздің арнаулы оқу орындарына арналған білім гранттарын бөлуде мөлдірліктің сақталуына жағдай туғызып отыр. Нақтылап айтқанда, бұдан былай гранттарды бөлетін комиссия отырыстарына азаматтар бақылаушы ретінде қатысатын болады.
Жылма-жыл ел бюджетінің қомақты бөлігі осы білім саласына бағытталады. Сондықтан жоғарыда қабылданған шешім қаражатты мақсатты жұмсауда ашықтықты айғақтайды. 
ҚР Мемлекеттік қызмет істері және сыбайлас жемқорлыққа қарсы іс-қимыл агенттігінің БҚО бойынша департаментінің қадағалауымен біздің өңірімізде де облыстық арнайы мониторингтік топ мүшелері білім гранттарын бөлу шараларына бақылаушы ретінде қатысады. Бұл бастамаға қолдау білдірген облыстық білім басқармасы арнаулы оқу орындарына оқуға түсу емтихандарына (тест, шығармашылық, әңгімелесу т.б.), білім гранттарын бөлудегі комиссия отырыстарына облыстық арнайы мониторингтік топ мүшелерінің тәуелсіз бақылаушы ретінде атсалысуын қамтамасыз етуге ниетті.